und dia Päärla hant sich g’ordnet om da Hammel mit am Kraa’z...

Guck! – dr Friedr stellt da Wecker voar dr Hammelta’z beginnt,

damit, wenn dear runterrasslat ma dös Gewinnerpäärle findt.

Nau gatts los! – d’Musik dui dudlat dideldei und dideldum...

und mit Jauchza tanzat d’Päärla om dean fetta Hammel rom - -.

Jetzt – denkat’s, - wenn jetzt dr Wecker ra’käm, wär der Hammel mei‘!

- - - Dear gat et ra oms Verrecka, dr Friedr guckt, was schuld mag sei‘

G’stülpt hat’r über sein Wecker no an Hafa, daß schöa tuat. –

lupft dean ra’jetzt, guckat nonter, seit nau: “Leitla, jetzt isch guat!“

Dreimaul gatt’s so – immer wieder Friedr’s Häfale lupfa tuat,

guckat nach sein blöda Wecker! - - - He’macha ket’earn vor Wuat!

- D’Leit send he‘ – vor lauter tanza, d’Musik spielt sich d’Goscha wund,

doch – dr Wecker tuat halt edda! - - - was isch den dau wohl dr Grund?

s‘war ganz oifach: - denn dr Wecker hat a Knöpfle oba drauf,

dau druckt morgens, wann’r ra’kommt dr Friedr mit am Dauma drauf.

nau ka‘ dear dean nemme störa! - - - Soo hat an dear Hafa druckt

auf dean Knoopf von sellam Wecker...Schadafroah dr Hammel guckt!

- - „Auf gatt’s, Leitla!“ – schreit dr Friedr – Jetzt muaß klappa! – Dideldei...

und: s‘hat klappt nau ohne Hafa und da Hammel g’winnt: d’Marei - -.

Dui, am Strickla nemmt da Hammel, dear macht „bäh“ und freit sich bloß - ,

an dear wauhra G’schicht siehscht wieder: d’Ursach klei und – d’Wirkung groß!